उकडीचे मोदक रेसिपी: घरच्या घरी बनवा मऊ, चविष्ट मोदक

गणेशोत्सव म्हटलं की घरात दरवळणारा उकडीच्या मोदकांचा सुगंध आणि नैवेद्याच्या ताटात सजलेले सुंदर कळीदार मोदक डोळ्यासमोर येतात. मऊसूत उकड, नारळ-गुळाचे खमंग सारण आणि सुंदर कळ्या असलेला मोदक बनवणे अवघड वाटत असले, तरी काही महत्त्वाच्या गोष्टी लक्षात ठेवल्या तर घरच्या घरी मऊ, सुबक आणि चविष्ट मोदक सहज तयार करता येतात.

साहित्य

सारणासाठी

• नारळाचा चव – २.५ कप

• बारीक चिरलेला गूळ – १¼ कप

• खसखस – १ चमचा

• साजूक तूप – १ चमचा

• वेलची पूड – ½ चमचा

मोदकाच्या उकडीसाठी

• तांदळाची पिठी – २.५ कप

• दूध – ¼ कप

• पाणी – १¼ कप

• मीठ – पाव चमचा

• तूप – १ चमचा

नारळ-गुळाचे सारण असे तयार करा

सर्वप्रथम मोदकाचे सारण तयार करून घ्या. कढईत तूप घेऊन त्यात खसखस मंद आचेवर हलकी भाजून घ्या. त्यानंतर नारळाचा चव घालून दोन ते तीन मिनिटे मंद आचेवर परता. यामुळे नारळातील अतिरिक्त ओलावा कमी होतो आणि सारण अधिक खमंग होते.

आता त्यात बारीक चिरलेला गूळ घालून मध्यम आचेवर परता. गूळ पूर्ण विरघळल्यानंतर आणखी दोन ते तीन मिनिटे मिश्रण परता. सारण ओलसर असावे, पण त्यात अतिरिक्त पाणी राहू नये. शेवटी वेलची पूड आणि भाजलेली खसखस घालून सर्व मिश्रण एकत्र करा. गॅस बंद करून सारण पूर्ण गार होऊ द्या.

मऊसूत उकड कशी तयार करायची?

सारण तयार झाले की आता मोदकाची मऊसूत उकड तयार करण्याची वेळ. उकडीचा पोत योग्य असेल, तर मोदकाची पारी करणे आणि त्याला सुंदर कळ्या पाडणे दोन्ही सोपे जाते.

एका पातेल्यात १¼ कप पाणी आणि ¼ कप दूध घेऊन त्याला उकळी आणा. त्यात पाव चमचा मीठ आणि १ चमचा तूप घाला. उकळी आल्यानंतर आच कमी करून तांदळाची पिठी घाला आणि कलथ्याने व्यवस्थित मिसळा.

मिश्रण एकजीव झाल्यावर गॅस बंद करा आणि पातेल्यावर झाकण ठेवून सुमारे दहा मिनिटे उकड तशीच ठेवा. त्यानंतर ती परातीत काढून गरम असतानाच चांगली मळून घ्या. हाताला चटका लागू नये म्हणून सुरुवातीला मॅशर किंवा चमच्याच्या साहाय्याने उकड मऊ करून घेऊ शकता.

उकड मळताना गरजेनुसार थोडे पाणी किंवा तूप वापरा. उकड गुळगुळीत आणि मऊसूत झाली, तसेच गोळा करताना कडेने चिरा पडत नसतील, तर ती मोदक बनवण्यासाठी योग्य तयार झाली आहे.

आता मोदकांना द्या सुंदर कळीदार आकार

उकड तयार झाली की तिचे समान आकाराचे छोटे गोळे करून घ्या. प्रत्येक गोळ्याची पारी करताना ती कडेने पातळ आणि मधोमध किंचित जाड ठेवा. पारीमध्ये भरपूर सारण भरून कडेने बोटांच्या साहाय्याने कळ्या पाडा.

कळ्या पाडताना त्या शक्य तितक्या खालपासून व्यवस्थित पाडल्यास मोदक अधिक सुंदर दिसतो. सर्व कळ्या एका दिशेने वळवल्यानंतर त्या अलगद एकत्र आणून मोदकाचे तोंड बंद करा. तयार केलेले मोदक झाकून ठेवा आणि उरलेली उकडही ओल्या कपड्याने झाकून ठेवा, त्यामुळे ती कोरडी पडणार नाही.

मोदक वाफवताना लक्षात ठेवा

सगळे मोदक तयार झाले की शेवटची आणि तितकीच महत्त्वाची पायरी म्हणजे त्यांना योग्य प्रकारे वाफवणे.

मोदक वाफवण्यासाठी चाळणीवर केळीचे पान किंवा हळदीचे पान ठेवू शकता. पान उपलब्ध नसेल तर चाळणीला थोडे तूप लावून त्यावर मोदक ठेवले तरी चालते. मोदक चाळणीवर ठेवताना त्यांच्यामध्ये थोडे अंतर ठेवा, त्यामुळे वाफवताना ते एकमेकांना चिकटणार नाहीत.

झाकण ठेवून पहिली ५ मिनिटे मोठ्या आचेवर आणि त्यानंतर ६ ते ७ मिनिटे कमी आचेवर मोदक वाफवून घ्या. वाफवल्यानंतर त्यांच्या कळ्या खुलून येतात आणि बाहेरून हलका गुळगुळीत थर दिसू लागतो.

मऊसूत मोदकांसाठी पिठीही महत्त्वाची

मऊसूत आणि सुबक उकडीचे मोदक (Ukadiche Modak) बनवण्यासाठी चांगल्या प्रतीची मोदक पिठी वापरणेही महत्त्वाचे आहे. Sarita’s Kitchen ची मोदक पिठी योग्य तांदळांचे मिश्रण वापरून तयार केली जाते, त्यामुळे घरच्या घरी मोदक बनवताना ती सोयीची ठरू शकते.

गरमागरम मोदकावर साजूक तूप घालून गणपती बाप्पाला नैवेद्य दाखवा. योग्य प्रमाण, मऊ उकड, भरपूर नारळ-गुळाचे सारण आणि योग्य वाफवण्याची पद्धत या गोष्टी लक्षात ठेवल्या, तर घरचे उकडीचे मोदक मऊसूत, सुबक आणि चविष्ट बनवता येतील.

Sarita’s Kitchen ची मोदक पिठी वापरून यंदाच्या गणेशोत्सवात मऊसूत, कळीदार आणि चविष्ट उकडीचे मोदक नक्की करून पाहा!